第4次化療

2013年5月28日（星期二）抽血+見醫生

不知是否上次回魂的時間長了些，好像很快又到抽血和見醫生的日子！由於老公有些假要在月底前清，所以難得地可以和我去醫院抽血，之後他說不如順便去睇鴨仔喎！:D

閉關的日子，敝莊主從沒想過要到外邊逛，平時出外的地方只有醫院和返附近的教會！但又想，化療前夕都應該是我最壯的時候，應該都無妨啦！:)

其實我一向都不喜歡去鬧市，所以快手影幾張相便走了！這次應該是我化療後第一次搭公共交通「去街」！

下午見醫生，老公要返工，由於見醫生這活動實在太費時和無聊，所以敝莊主一個人去就可以了！

上兩次都是同一個女醫生，今次這個男醫生敝莊主第一次見喎！言談中，覺得這個醫生挺好啊！起碼溫文有禮有誠意有耐性也沒有說行貨的癈話！:)

醫生：你有冇咩問題想問？
我：如果到咁上下（癌細胞）都已經死鬼晒的話，可唔可以唔洗做六次？
醫生：唔好喇！你呢個可以根治，差少少復發就唔好啦！六次之後再照PET scan啦！

我：我想問，做得多呢D血管係咪會冇乜彈性？上次插個豆好鬼痛呀！
醫生：你現在應該還OK呀！有D打得耐會真係難搵Ｄ，但你OK呀！

我：上次我條脷痺痺地咁，但之前又冇咁既？D藥的份量係咪同之前的一樣？
醫生：一樣呀！...咁痺我又唔係好清楚，但如果一些反應過一段時候是會散的，都沒問題的！

我：我想問呢，咪話可以做下運動既？可以跑步嗎？
醫生：看幾劇烈啦！普通慢慢跑都得既，同埋看在那一段時候，開頭就唔係咁好啦！因為容易受感染，但去到後段的話，都冇乜所謂啦！

敝莊主聞後眼睛發亮，很久沒跑過了，真的想試下！這個醫生都說得較中肯，起碼比起最初那個醫生說的「100個沒事，鬼知你會否是那一個」沒這麼行貨！:)

等見醫生等了半個鐘，之後等護士叫名反而還等得久，等了個幾鐘！=.=

終於叫我了，護士拿著好幾份文件說：「那明天9點鐘......」什麼？！明天？！我還以為會是星期四添！忽然所有計劃都打亂了，我還打算明天踩trainer或試下跑步，明晚炆多次豬手食，然後就好上路！突然在明天，我要準備早餐午餐等東西啊！o.O

2013年5月29日（星期三）：第4次化療

今次未有足夠的心理準備便來做第4次，幸好之前一晚老公還可以買到Strawberry，有些水果食下開心些！另外今次連得力素葡萄糖都帶來，口苦口痺口啖時可以頂一陣！

又要拮豆！護士1號正在為一名人士拮，護士2號可能認得我上次鬼叫，一見到我就說：「呀！呢個要.....（講了個我唔識的英文！@@）」護士1號望了望，說：「OK的！她（血管）明顯的！」於是護士2號就幫我拮了！

被拮兩次的罪證！:'(

我已經很冷靜沉住氣由她拮的了，好！拮了！怎料護士2號說：「唔得呀！冇血呀！」呢條友係度講緊乜？唔明！當她再講多幾次時，我才想是否發生了什麼事？她說：「唔好意思... 唔得呀！要整過！」我不可置信地瞪著她，唔係呀嘛？！晴天霹靂！o.O

最後還是要較專業的護士1號來！=___=

家姐在我settle down後來到，老公下午放假來，他來接力後家姐便去了我家煲海底椰雪耳蘋果水！而我在未準備好下便完成了第4次！

四時許回到家後原本很想去睡，但又想到睡醒後可能會沒胃口，所以不如早點吃晚餐啦！見兩名助手都在家，唔好晒啦！咁家姐幫手切蕃茄和洋蔥，敝莊主就可以煮肉醬意粉！:P

結果，5:45pm已吃晚餐，6:45pm已經去睡了！Zzzz...

副作用

原本打算在星期三炆的豬手，結果在星期四炆，但其實一早預料過化療後未必會想食，但見老公說他會吃，家姐又說煮了後可放冰箱，結果我都有煮，但最後果然是一點也不想吃！我聞到那些味已經想嘔，見到更加反胃！最後成煲1.5kg豬手被老公分三次食鬼晒！=___=

今次我對副作用有足夠的心理準備，所以當它來到的時候都是沉著應戰，有些到今天仍未散去，但忍多陣吧！我知道現在食乜飲乜都沒用的了，但時候到了，它就會過去！回頭望時，我都不明為何上一次的心情那麼差？！可能上次只是理性上接受要與不適情況共存，但最後還是不甘心做什麼都無補於事，加上未試過這情況，所以淪陷了？！

自己開始有不成文的做法：「頭七」如非必要都不要出街，尤其是一個人！我的學生最初聞後說：「嚇死人咩？講到咁恐怖！」她指頭七？哇哈哈！但敝莊主的意思咪指頭七日囉！後來我更變本加厲：「我頭七緊呀！」敝莊主百無禁忌！大吉大利！XDD

希望六次之後真的可以永遠脫離化療，我想過番一些正常的生活，吃我想吃的東西，做我想做的活動！:)

後記

寫好篇blog及post了後，忽然「發作」起來！之前還摸不著頭上次幹嗎那麼失落，轉個頭便莫名地失落起來，原來是不能理解的！跟上次一樣，whatsapp不想覆，話也不想說，冇晒mood，但又繼續機械式運作，再次淪陷...... 不同的是，我今次會當這是「正常」的反應，心情尚算平靜，只是沒趣而已！


上一篇：走過流淚谷
下一篇：第一次跑步